आमा बनेपछि महिलाको शारीरिक संरचना बिग्रन्छ, मोटी र भद्दा देखिनु स्वाभाविकै हो।

तर, बलिउड अभिनेत्रीहरूको सन्दर्भमा भने यो कुरा लागू हुँदैन। जस्तो अवस्थामा पनि ज्यानलाई फिट राख्न सकिन्छ भनेर केही अभिनेत्रीले देखाएका छन्।

उनीहरू आमा बनिसकेपछि पनि उत्तिकै सुन्दर छन् । सौन्दर्यको व्यवसायमा पनि सक्रिय छन् । आमा बनिसकेपछि पनि उस्तै फिट केही अभिनेत्रीहरूको बारेमा यहाँ चर्चा गरिन्छ।

ऐश्वर्या राय

ऐश्वर्या रायले सन् २०१२ को नोभेम्बरमा छोरी आराध्यालाई जन्म दिएकी हुन्। शरीर र पेट बढ्न थालेदेखि नै सुरु भएको चर्चा उनी पुनः ‘ट्रिम एन्ड स्लिम’ भइसक्दा पनि सेलाएको छैन। आमा बनेका बलिउडकर्मीमध्ये उत्तम आमा को हुन् भनी गरिएको पछिल्लो अनलाइन सर्वेक्षणमा पनि उनकै नाम पहिलो स्थानमा आएको छ।

कुशल माताका रूपमा घरभित्र र बाहिर उनको तारिफ हुने गरेको छ । आमा बनेपछि उनले केही वर्षसम्म फिल्मी जगत्बाट आफूलाई अलग गरिन् । ‘यसो गर्नु मेरो बाध्यता थिएन, रहर थियो।

आमा बन्दाको अनुभूतिमा म रमाइरहेकी थिएँ,’ उनी भन्छिन् । उनकी सासु जया बच्चनले ऐश्वर्यालाई मातृत्वमा पूरै रमाउने कुशल आमाको संज्ञा दिएकी छिन्।

‘आमा बन्नु फुल टाइम जब हो । एकैपटक एउटाभन्दा ज्यादा जबमा इन्गेज हुन चाहनेलाई परिवारले पूर्ण सहयोग नगरी हुँदैन,’ उनी भन्छिन् । कुनै लामो यात्रामा निस्कनुपर्दा उनी सधैँ छोरीलाई साथमा लैजान्छिन्।

‘सासुससुरा पनि आराध्यासँग खेलिरहनुहुन्छ । उहाँहरू नभएको भए मेरी छोरीले पूर्ण ममता हासिल गर्ने थिइनन् होला,’ उनी भन्छिन् । हजुरबुबा–हजुरआमासँग हुर्किनु बच्चाका लागि सौभाग्य भएको टिप्पणीसमेत उनले गरेकी छिन्।

‘जति लामो समय सन्तानको हेरचार गर्नुपरे पनि यसमा इन्जोय गर्नुपर्छ । सन्तान भनेको ईश्वरको आशीर्वाद हो भन्ने हामी सबैले ख्याल गर्नुपर्छ,’ उनी भन्छिन्।

शिल्पा शेट्टी

बलिउड अभिनेत्री शिल्पा शेट्टी आमा बनेर जब बाहिरी संसारसामु गइन्, त्यतिबेला उनको शरीर आमा बन्नुअघि भन्दा रत्तिभर पनि मोटाएको थिएन।

‘यो सब फिटनेस प्लानको कमाल हो । आमा बनेपछि पनि खानपानमा अनुशासित हुने र योगका निश्चित आसन गर्न सकिन्छ। यसो गर्दा आमाको फिटनेस हराउन पाउँदैन,’ योगसम्बन्धी विभिन्न डिभिडी सार्वजनिक गरिसकेकी योगगुरुसमेत रहेकी शिल्पाले भनिन्।

पति तथा बेलायती व्यवसायी राज कुन्द्राका तर्फबाट शिल्पाले भिभान नाम गरेको छोरालाई जन्म दिएकी छिन्। छोरालाई लिएर उनी सार्वजनिक कार्यक्रममा आक्कलझुक्कल देखिने गर्छिन्।

फिल्मी काममा उत्तिकै व्यस्त उनले यसको असर आफ्नो छोराको लालनपालनमा पर्न भने दिएकी छैनन्। ‘छोरो हुर्कँदै गयो। उसँग रहँदा भित्रैदेखि रमाउँछु। आमाको रोल मैले जीवनमा गरेका अन्य सबै रोलभन्दा रमाइलो र उत्तम लाग्छ,’ शिल्पाको ठहर छ । फिल्मलगायत अन्य काममा व्यस्त भइरहँदा पनि आफ्नो ध्यान छोरापट्टि नै हुने गरेको उनी बताउँछिन्।

पति राज कुन्द्राले आमाको भूमिका र प्रोफेसनल काम गर्न आफूलाई सक्दो सघाएको उनी बताउँछिन्। केही समयअघि भारतीय शहर लखनउमा आयोजित पत्रकार सम्मेलनमा पत्रकारहरूले सुरुमै शिल्पालाई ‘छोरो नलिई आउनुभएछ, खोइ छोरो ’ भनी सोध्दा शिल्पाले भनिन्, ‘ऊ ड्याडीसँग होटलमा छ। आज ऊ बाबुसँग रमाइरहेको छ।’

३७ वर्षमा आमा भएकी उनी अरूलाई चाहिँ यति ढिलो बच्चा नजन्माउन सल्लाह दिन्छिन्। ‘यसको स्वास्थ्यसम्बन्धी मात्र होइन, अन्य कारण पनि छन्,’ शिल्पा भन्छिन्।

काजोल

बलिउडकी अब्बल अभिनेत्री, असल आमा र कुशल पत्नीमा गनिन्छिन्, काजोल । अजय देवगनकी पत्नी काजोल दुई बच्चाकी आमा हुन्।

जेठी सन्तान छोरी न्यासा छोरो युगभन्दा सात वर्ष जेठी छिन्। दुई सन्तान पाएर पनि आफ्नो फिटनेस र अनुहारको कान्ति नगुमाएकी काजोल अहिले बलिउडमा भव्य ‘कमब्याक’ गर्ने तरखरमा छिन् । उनको पछिल्लो फिल्म ‘माई नेम इज खान’लाई दर्शकले खूब रुचाएका थिए ।

करिअरको उत्कर्षमा पुगेको बेला बिहे गरेकी काजोल त्यसपछि गुमनामजस्तै भएकी छिन् । उनले त्यही अवस्थामा छोरी न्यासालाई जन्म दिइन्। ‘त्यसपछि म टेलिभिजनमा देखिन थालेँ, केही विज्ञापनमा पनि काम गरेँ । त्यसअघि म सन्तानको हेरचार र घरगृहस्थीमै रमाइरहेकी थिएँ,’ काजोल भन्छिन्।

बाबुभन्दा आमालाई परिवारमा बढी सहज हुने काजोलको भनाइ छ। ‘आमाको भूमिका सुरुमै प्रस्ट हुन्छ, तर बाबुले आफ्नो भूमिका कस्तो हुने भन्ने आफैँ तय गर्नुपर्छ,’ उनी भन्छिन्।

आमा बन्न स्वीकार गर्नु भनेको नयाँ अनुभूति र चुनौती स्वीकार गर्न आफूलाई तत्पर बनाउनुसरह रहेको उनको भनाइ छ । सन्तान जन्माएपछि आफ्नो जीवनमा कत्रो आमूल परिवर्तन आउँछ भनेर महिलाले त्यसअघि कल्पना पनि गर्न नसक्ने उनी बताउँछिन्।

‘पहिलोपल्ट गर्भ बसेको थाहा पाउँदा म साँच्चीकै आत्तिएकी थिएँ, जीउ लल्याकलुलुक भएको थियो । आमा बन्ने चरणसम्म पुग्छु कि पुग्दिनँ भन्नेमा पनि मलाई सन्देह थियो। तर, बिस्तारै सबै कुरा सामान्य बन्दै गयो,’ उनी भन्छिन् ।
गर्भवती महिला देवी हुन् भन्ने लाग्थ्यो काजोललाई । ‘तर, आफैं गर्भवती भएपछि मैले आफूलाई देवीको आसनमा राख्न सकिनँ । यो त्यति ठूलो कुरा पनि होइन रहेछ,’ काजोल भन्छिन् ।

गर्भवती भएपछि श्रीमान्, आमा र बहिनीले आफूलाई असाध्यै साथ दिएको उनी बताउँछिन् । ‘यस्तो साथले नयाँ चुनौतीको सामना गर्ने सामथ्र्य बढाउँदो रहेछ,’ उनी भन्छिन्।

करिश्मा कपुर

कुनै समय बलिउड अभिनेत्री करिश्मा कपुरले ‘बिबी नम्बर वान’ फिल्ममा अभिनय गरेकी थिइन् । श्रीमान् सञ्जय कपुरसँग डिभोर्स गरेकी उनले आफूलाई ‘बिबी नम्बर वान’ बनाउन सकिनन्, तर आफूलाई ‘मदर नम्बर वान’ चाहिँ साबित गरिन्।

उद्योगी सञ्जयसँग डिभोर्स गरे पनि करिश्माले उनका तर्फबाट दुई सन्तान जन्माएकी छिन्, जेठी छोरी समैरा र कान्छो छोरो कियान । उनले ‘डेन्जरस इश्क’मार्फत बलिउडमा कमब्याक गरिसकेकी छिन्। उनको अघिल्लो फिल्म ‘इश्क’ले जति ‘डेन्जरस इश्क’ले सफलता कमाएन, तर फिल्ममा करिश्माको अभिनय र आमा बनेपछि पनि उनको ‘फिट एन्ड फाइन’ शरीरको भने सर्वत्र तारिफ भयो।

अहिले उनी विज्ञापन, फिल्म, टेलिभिजन कार्यक्रम र सार्वजनिक कार्यक्रममा व्यस्त भइरहन्छिन् । तर, जतिसुकै व्यस्त भए पनि उनले सन्तानलाई आमाको कमी महसुस हुन दिएकी छैनन्। ‘यसका लागि मैले दिनभरिको समयतालिका सुरुमै बनाउने गरेकी छु।

यसो गर्‍यो भने सबै कुराका लागि समय छुट्याउन सकिन्छ,’ उनले भनिन् । छोराछोरीलाई वाकमा लैजाने, नुहाइधुवाइ गरिदिने तथा उनीहरूका लागि खाना पकाइदिने जम्मै काम करिश्मा आफँैले गर्ने गरेकी छिन्।

करिश्माले छोराछोरीलाई अहिलेदेखि नै अनुशासनको पाठ पढाइरहेकी छिन् । ‘समाजमा रहन व्यक्तिले केही अनुशासन पालना गर्नैपर्छ।

यसका लागि बच्चैदेखि मानिसलाई अभ्यस्त गराउन सकियो भने सहज हुन्छ,’ उनी भन्छिन्, ‘आफ्नो तर्फबाट मैले सन्तानलाई यस्ता कुरामा अभ्यस्त गराउने काम गरिरहेकी छु। म घरमा नहुँदा के गर्ने, के नगर्ने, कुनकुन कुरा चलाउने र कुन कुरा नछुने भन्ने बताउने गरेकी छु । कुनै कुरामा दुई जनाबीच मनमुटाव भयो भने कसले भनेको कुरा लागू हुने भन्ने पनि मैले बताउने गरेकी छु।’

आफू घरमा भएको बेला मात्रै टीभी हेर्न छोराछोरीलाई उनले छुट दिएकी छिन् । ‘टिभी धेरै हेरे भने पढाइ बिग्रला कि भन्ने डर लाग्छ,’ उनी भन्छिन् । सन्तान बुझ्ने भएपछि आफू सिंगल मदर हो भन्ने कुरा उनीहरूलाई बुझाउनुपर्ने उल्लेख गर्दै उनले भनिन्, ‘उनीहरूलाई यस्तो कुरा बुझाउन सकियो भने उनीहरू विवेकी बन्दै जान्छन् भन्ने मलाई लाग्छ ।’

सुष्मिता सेन

बलिउड अभिनेत्री सुष्मिता सेन बलिउडकी यस्ती एकमात्र आमा हुन्, जसका दुवै सन्तान उनका आफ्नै होइनन् । उनले दुई छोरीलाई ‘एडप्ट’ गरेकी छिन् । सिंगल मदर भएर उनले दुई छोरीको लालनपालन गरिरहेकी छिन्।

१८ वर्षको कलिलो उमेरमै सुष्मिताले छोरी रिनीलाई एडप्ट गरेकी थिइन् । ‘त्यतिबेला बलिउड वृत्तमा मात्र होइन, भारतभरि नै अविवाहित युवतीले सन्तान एडप्ट गरेको कुरा सुनिँदैनथ्यो,’ उनले भनिन्।

रिनीलाई असीम प्रेम र मातृत्व प्रदान गरेर उनले हुर्काइन् । रिनी हुर्केपछि उनले कान्छी छोरीलाई एडप्ट गरिन् । ‘मेरी कान्छी छोरी त्यतिबेला दुई वर्षकी थिइन्, उनको नाम मैले एलिसा राखेँ,’ सुष्मिता भन्छिन्।

सुष्मितालाई भारतका विभिन्न सञ्चारमाध्यमले बलिउडकी सबैभन्दा सफल ‘सिंगल मदर’को संज्ञा दिने गरेका छन् । बच्चाबच्ची भनेपछि हुरुक्क हुने स्वभाव भएकाले आफूले टिनएजसमेत पार नगर्दै आमा बन्ने निश्चय गरेको उनी बताउँछिन्।

विभिन्न सार्वजनिक कार्यक्रम तथा फेशन शोमा उनले छोरी रिनीलाई साथै लिएर जाने क्रमलाई अहिले पनि निरन्तरता दिइरहेकी छिन्।

दुवै छोरीको बर्थडे सुष्मिताले धुमधामका साथ मनाउने गरेकी छिन्। परिवारका सबैलाई भेला गराएर उनले छोरीहरूको बर्थडे मनाउने गरेकी छिन् । ‘मेरा छोरीहरूको जन्मदिनले पूरै परिवारलाई एकैठाउँमा भेला गराउने गरेको छ,’ उनी भन्छिन्।

‘सन्तान एडप्ट गर्नु र सिंगल मदर बन्नु मेरो व्यक्तिगत निर्णय थियो । मातृत्वप्रतिको लगावले मलाई यस्तो काम गर्न प्रेरित गरेको थियो । सामाजिक जागरण ल्याउनु मेरो उद्देश्य थिएन,’ उनी भन्छिन्, ‘मेरो कदमले सामाजिक जागरण ल्याएको रहेछ भने अझ राम्रो भयो, तर यो मेरो प्राथमिकतामा कहिल्यै परेन।’

आफैंले नजन्माएको छोरीको माया कसरी लाग्छ भनी गरिएको एक प्रश्नमा उनले भनेकी थिइन्, ‘प्रेम जैविक कुरा होइन, यो भावनात्मक कुरा हो। हरेक बच्चा फरक हुन्छ। वास्तविक प्रेमले यो फरकपनलाई नै प्रेम गर्छ। मेले छोरीहरूलाई साक्खे आमाले भन्दा कम प्रेम गरेकी छैन,’ उनी भन्छिन्।

एजेन्सीको सहयोगमा तयार पारिएको

Facebook Comments Box

LEAVE A REPLY

Please enter your comment!
Please enter your name here